O Miradoiro da Granxa de Montero Ríos

Neste miradoiro, de tempos de Montero Ríos, destaca, baixo unha parra de ferro fundido e rodeado de magnolios, a mesa de pedra, de seis metros de lonxitude e metro e medio de ancho, nunha soa peza. Contan os veciños e veciñas que foi traída da Illa de Tambo en barco e despois subida, desde a entrada, por carro de bois. Conta a xente que a mesa, que é moi baixa, resulta incómoda ao cabo dun tempo, o que aproveitaba Montero Ríos, que era de perna curta, nas súas negociacións, pois os seus opoñentes estaban desexando chegar a un acordo. Tamén contan que nesa mesa chegou a haber negociacións despois da Guerra de Cuba, que culminarían no Tratado de París.

—