A Granxa de Montero Ríos

Montero Ríos creou a súa granxa a partir da "Granxa da Serra" e da "Granxa de Blanco". A Granxa da Serra foi do Marqués de Sierra e despois dos seus descendentes. En 1791 deixa de estar vinculada ó marquesado de Sierra. En 1879 Montero Ríos compra "A Granxa da Serra". Nese momento xa sería da súa propiedade "A Granxa de Blanco", colindante coa da Serra, de mans da Marquesa de Astorga (xunto con parte da Illa de Tambo). A maiores tamén foi comprando a particulares, ata completar as 52 Has. que posúe hoxe a Granxa. En 1943 foi adquirida pola Deputación de Pontevedra ós herdeiros de Montero Ríos. Inicialmente, creouse o C.R.E.I.E.F. (Centro Regional de Enseñanzas e Investigaciones y Experiencias Forestales). Nas últimas décadas, foi cedido á Xunta de Galicia, que a xestiona, e da Administración autonómica dependen tanto o Centro de Investigacións Forestais de Lourizán, como a Escola de Capataces Forestais de Lourizán, ambas institucións situadas en terreos da Granxa. O xenérico "granxa" fai referencia ó conxunto dun pazo ou casa grande coas terras circundantes.

—