Os Carramales

Mantemos Carramales como forma dialectal: - O ALGa rexistra en Pontevedra (P15) que os substantivos co singular en -al forman do plural en -ales. Mostran isto os mapas 71 currales e 72 catedrales. Ademais, aínda que en Pontevedra (P15) rexistra reás (plural de real, mapa 19), moi preto recolle a forma reales: na Lama (P17), no Morrazo (P18 e P21) e en todo o sur da provincia de Pontevedra. Carramal, a forma en singular, está ben documentada como lugar de Salcedo. - Dialectoloxía da lingua galega, Fernández Rei (Xerais, 1990): (páx. 65) “A solución animales, máis que dun castelanismo morfolóxico, ben pode deberse a unha evolución xerada polo propio galego, o mesmo que pasou no norte de Portugal, onde os jornales, cordeles, funiles, faroles, etc., uns preto de Galicia e outros, como en Matosinhos, xa bastante afastados do galego, non se poden explicar por influxo do español cando o portugués patrón exerce a acción contraria ao ter solución -ais, -eis, etc.”